बिहार शराब केस : जहरीला शराब के चलते मशरक अवुरी पनापुर में अभी तक 14 लोग के मौत हो चुकल बा, 30 से जादे बेमार बाड़े।
छपरा जिला में अब तक मिलावट वाला शराब के सेवन से 14 लोग के जान गंवा चुकल बा। मिलल जानकारी के मुताबिक शुक्रवार के सांझ तक मशरक में मिलावट वाला शराब पिए के चलते कुल 12 लोग के जान गंवा चुकल बा। पानापुर में भी दू जने के मौत हो चुकल बा। एकरा अलावे मधौरा से एक मौत के जानकारी भी मिलल। लेकिन शराब पिए के चलते उ आदमी के मौत भईल कि ना, एकर अभी तक पुष्टि नईखे भईल। ओह 14 लोग के मौत हो गइल बा. उनुका परिवार के लोग के कहनाम बा कि उ मिलावट वाला शराब पीयत रहले। 30 से अधिका लोग बेमार बतावल जात बा. जबकि जिला प्रशासन अभी तक मात्र सात लोग के संदिग्ध मौत के पुष्टि कईले बा। प्रशासन के मुताविक मशरक स्वास्थ्य केन्द्र आ सदर अस्पताल मे फिलहाल १२ जने के इलाज चल रहल बा । जबकि 13 लोग इलाज के बाद ठीक होके घरे चल गईल बाड़े।
मशरक में शुक का दिने एक जने के मौत हो गइल
मशरक क्षेत्र के ब्राहिमपुर में मिलावट वाला शराब पीये से अधिकांश लोग के जान गंवा चुकल बा। इहाँ अब तक कुल 12 लोग के मौत हो चुकल बा। जवना में से गुरुवार तक 11 लोग के मौत के खबर बा। शुक्रवार के मशरक स्वास्थ्य केंद्र में इलाज खाती आईल पीड़िता के सदर अस्पताल ले जाए के दौरान मौत हो गईल। जवना के पहचान गणौली के 45 साल के हीरा महतो के रूप में भईल बा। शुक्रवार के भी जांच खाती 10 से जादे लोग पहुंचले। एहमें से 36 बरीस के खजुली निवासी अरविंद महतो के हालत गंभीर बतावल जात बा. परिवार के लोग के कहनाम बा कि अरविंद मिलावट वाला शराब के सेवन कईले रहले। उनकर नज़र भी कमजोर हो गइल बा।
स्वास्थ्य विभाग के टीम गांव के जांच में जुटल बिया
डीएम अमन समीर के निर्देश प सिविल सर्जन डॉ. सागर दुलाल सिंह स्वास्थ्य विभाग के टीम बनवले बाड़े। जवना के माध्यम से मशरक के ब्रहिमपुर अवुरी आसपास के गांव में जांच कईल जाता। लोग से अपील कईल जाता कि स्वास्थ्य केंद्र में आके बेमार पड़ला प आपन जांच करावस। प्रभावित गाँव में स्वास्थ्य शिविर भी लगावल गइल बा। जहाँ 24 घंटा एम्बुलेंस उपलब्ध बा। एकरा अलावे मशरक स्वास्थ्य केंद्र के अलर्ट मोड में भी राखल गईल बा। एकरा अलावे सदर अस्पताल में एक वार्ड के रिजर्व मोड में राखे के निर्देश भी दिहल गईल बा।
स्पेशल एसआईटी जांच कर रहल बा
एह पूरा मामिला के जाँच करे खातिर एगो विशेष एसआईटी बनावल गइल बा. एसपी डॉ कुमार आशीष के निर्देश प कार्रवाई शुरू क दिहल गईल बा। एसआईटी एएसपी डॉ राकेश कुमार के नेतृत्व में छापामारी करतिया। मिलल जानकारी के मुताबिक अभी तक कुल चार लोग के गिरफ्तार क लिहल गईल बा। संगही आठ लोग के शक में गिरफ्तार क पूछताछ कईल गईल बा। सपा बतवले कि पूरा जिला में शराब माफिया के खिलाफ कार्रवाई शुरू हो गईल बा। शराब के कारोबार से जुड़ल 40 से जादे आरोपी के अभी तक गिरफ्तार क लिहल गईल बा। 2000 लीटर से अधिका शराब जब्त कर लिहल गइल बा. एकरा संगे-संगे सभ सीमावर्ती इलाका में गहन जांच अभियान भी चलावल जाता।